107 o flynyddoedd ers i Hedd Wyn farw yn y Rhyfel Byd Cyntaf, mae arddangosfa barhaol newydd wedi’i gosod yn Yr Ysgwrn, yn dwyn y teitl ‘Yr Ysgwrn yn Ysbrydoli’. Mae’r arddangosfa hon yn archwilio dylanwad dwys Yr Ysgwrn ar lenyddiaeth, celf, a cherddoriaeth dros y ganrif ddiwethaf.
O feirdd fel T.H. Parry-Williams i Twm Morys, ac artistiaid fel Rob Piercy a Luned Rhys Parri, mae’r ffermdy yma yn Nhrawsfynydd wedi bod yn ffynhonnell ysbrydoliaeth dros y ganrif ddiwethaf, ac mae’r arddangosfa hon yn adlewyrchu hyn.
Diolch yn fawr i Lois Prys am gynllunio’r arddangosfa, i Branwen Haf am guradu, ac i Kevin Lane am osod.
Ymweliadau Ysgolion
Mae’r Ysgwrn yn annog a chroesawu ymholiadau gan ysgolion i ymweld â’r arddangosfa. Cysylltwch yn uniongyrchol â’r Ysgwrn os am ragor o wybodaeth.
Ymweld â’r Ysgwrn
Galwch draw i weld yr arddangosfa, ac i fwynhau paned a chacen dros olygfeydd bendigedig!